പരിസ്ഥിതിപ്രശ്നങ്ങള്‍ ഇത്രയും കാലം വ്യക്തികളെ നേരിട്ട് ബാധിക്കാതെയിരിക്കുകയായിരുന്നു. എന്നാല്‍ ഇന്ന് കാലാവസ്ഥാവ്യതിയാനവും ആഗോളതാപനവും മനുഷ്യരാശിയുടെ നിലനില്പിനെ തന്നെ ചോദ്യം ചെയ്യാന്‍ ആവുംവിധം ഭീഷണമായിരിക്കുകയാണ്. ഈ അവസ്ഥയിലാണ് ഭാരതീയവിജ്ഞാനത്തിന്‍റെ ഭാഗമായ 'നക്ഷത്ര വൃക്ഷങ്ങള്‍' എന്ന വിഷയത്തെപ്പറ്റി ഒരു പുസ്തകം എല്ലാ സാധാരണക്കാര്‍ക്കും ഉപയോഗിക്കാവുന്ന വിധം തയ്യാറാക്കിയത്. ഇതില്‍ പറഞ്ഞിരിക്കുന്ന എല്ലാ വൃക്ഷങ്ങളും മഹത്വമുള്ള ഔഷധവൃക്ഷങ്ങള്‍ ആണ്. പലതും നമ്മുടെ തൊടികളില്‍ നിന്നം അന്യം നിന്നുപോയവയുമാണ്. സ്ഥാപനങ്ങള്‍, ക്ഷേത്രങ്ങള്‍, പള്ളികള്‍, പൊതുസ്ഥലങ്ങള്‍ എന്നിവിടങ്ങളില്‍ ഈ 27 തദ്ദേശീയ ഔഷധവൃക്ഷങ്ങള്‍ വച്ചുപിടിപ്പിച്ചാല്‍ ആ സ്ഥലത്ത് ശുദ്ധവായുവും ധാരാളം ജലശേഖരവും ഉറപ്പാക്കാം

മലയാള കാവ്യലോകത്തില്‍ ലബ്ധപ്രതിഷ്ഠ നേടിയിട്ടുള്ള അനശ്വര പ്രതിഭാശാലിയാണ് കുമാരനാശാന്‍. മഹാകാവ്യങ്ങളെഴുതി മഹാകവിപട്ടം ഏറ്റുവാങ്ങുവാന്‍ ഇവിടത്തെ കവി യശഃപ്രാര്‍ഥികള്‍ കിണഞ്ഞു പരിശ്രമിച്ചിരുന്ന ഒരു കാലഘട്ടത്തില്‍, മനുഷ്യ കഥാനുഗാനംതന്നെയാണ് തന്‍റെ കവിത്വസിദ്ധിയുടെ പ്രത്യക്ഷവല്‍ക്കരണത്തിന് നിദാനമായിട്ടുള്ളതെന്ന നിഗമനത്തില്‍ ഉറച്ചുനിന്നുകൊണ്ട് സര്‍ഗസൃഷ്ടികളിലേര്‍പ്പെട്ട് സര്‍വാദൃതമായ ജനകീയാംഗീകാരം നേടി മഹാകവിയായിത്തീര്‍ന്ന അദ്ദേഹം മലയാളത്തിന്‍റെ മഹത്പ്രതിഭയാണെന്ന കാര്യത്തില്‍ തര്‍ക്കമില്ല.
തികച്ചും പ്രാദേശികമായ നാലതിരുകള്‍ക്കുള്ളില്‍ ഒതുങ്ങിനില്‍ക്കാതെ ദേശീയമായ ഒരു ദര്‍ശനം-ഭാരതീയ ദര്‍ശനം-അദ്വൈത ദര്‍ശനംതന്നെ-തന്‍റെ ദര്‍ശനമാക്കിത്തീര്‍ക്കുവാനും ആ ദര്‍ശനത്തിന്‍റെ ദിവ്യപ്രകാശത്തില്‍ തനിക്ക് അനുഭവൈകവേദ്യമായ ജീവിത്തെ പുനഃപ്രകാശിപ്പിക്കുവാനും സ്വകാര്യ ദുഃഖങ്ങളുടെ ഭ്രഷ്ട്രഭൂമികളില്‍ കഴിഞ്ഞിരുന്ന തന്‍റെ സാഹിത്യജീവിതത്തിന്‍റെ പ്രഭാതങ്ങളില്‍തന്നെ ആശാന് കഴിഞ്ഞിരുന്നു.

വേദാന്തസാരമാണ് ഭഗവദ്ഗീത. ഓരോ വായനയിലും അര്‍ഥാന്തരങ്ങളുടെ അലമാലകള്‍ തുടിച്ചുയരുന്ന അപൂര്‍വമായ കാഴ്ചയാണ് ഗീതാപാരായണം സമ്മാനിക്കുന്നത്. ഗീതയ്ക്ക് നിരവധി വ്യാഖ്യാനങ്ങള്‍ മലയാളത്തിലും ഇംഗ്ലീഷിലുമായിട്ടുണ്ട്. ഓരോ വ്യാഖ്യാനവും അപഗ്രഥിച്ച് ഭഗവദ്ഗീതയ്ക്കൊരു പ്രശ്നോത്തരി നിര്‍മിക്കുക സാധ്യമല്ല. അത്രയേറെ വിപുലമാര്‍ന്ന ആശയവൈരുദ്ധ്യങ്ങള്‍ ചില വ്യാഖ്യാനങ്ങള്‍ തമ്മിലുണ്ട്. ഗീതാവ്യാഖ്യാനം പോലെ ഒരിക്കലും പൂര്‍ണമാകാത്ത ഒരു സമസ്യയാണ് ഗീതാ പ്രശ്നോത്തരിയും. രണ്ട് പാദങ്ങളുള്ള ഗീതയിലെ  ഒരു ശ്ലോകത്തില്‍ നിന്നു തന്നെ പത്ത് ചോദ്യങ്ങള്‍ ഉണ്ടാക്കാം. അത്രയും അതിഗഹനമാണ് ഓരോ ശ്ലോകവും. അങ്ങനെയുള്ള 700 ശ്ലോകങ്ങളില്‍ നിന്ന് ഏകദേശം 7000 ചോദ്യങ്ങള്‍ ഉണ്ടാക്കാന്‍ കഴിയും. അതൊരു ബ്രഹദ് ഗ്രന്ഥരചനയ്ക്കുള്ള മുതല്‍ക്കൂട്ടാണ്. എന്നാല്‍ അത്തരമൊരു സമീപനമല്ല ഇവിടെ സ്വീകരിച്ചിട്ടുള്ളത്. സാധാരണ വായനക്കാര്‍ക്ക് മനസ്സിലാക്കാന്‍ ബുദ്ധിമുട്ടുള്ള സാങ്കേതിക പദങ്ങളുടെയും നിര്‍വചിക്കാന്‍ ബുദ്ധിമുട്ടായ ചില വാക്കുകളുടെയും പ്രശ്നപരിസരങ്ങളെ ചോദ്യരൂപത്തില്‍ തയ്യാറാക്കി അവയ്ക്ക് വളരെ ലളിതമായി ഉത്തരം പറയുക എന്ന രീതിയാണ് ഈ പുസ്തകത്തില്‍ അവലംബിച്ചിട്ടുള്ളത്.

എല്ലാ ജീവജാലങ്ങള്‍ക്കും സുഖദുഃഖങ്ങള്‍ ഒരോര്‍മ മാത്രമാവുന്നു. സുഖവും ദുഃഖവും ഇടകലര്‍ന്ന നമ്മുടെ ജീവിതയാത്രയ്ക്കിടയില്‍ നാം കണ്ടുമുട്ടുന്ന യാഥാര്‍ത്ഥ്യങ്ങള്‍ക്ക് നേരേ ഒന്ന് കണ്ണോടിയ്ക്കുക മാത്രമാണ് ഞാനീ കവിതകളില്‍ ചെയ്തിട്ടുള്ളത്. നമ്മുടെ ചുറ്റുപാടുമുള്ള പല ഭാവങ്ങളും ഈ കവിതകളില്‍ ദര്‍ശിക്കാന്‍ കഴിയുമെന്നു വിശ്വസിക്കുന്നു. എന്‍റെ ആദ്യസംരംഭമായ ആയുര്‍രേഖ എന്ന കവിതാ സമാഹാരത്തിന് അവതാരിക എഴുതിത്തന്ന് അനുഗ്രഹമേകിയ മഹാകവി അക്കിത്തത്തിനും എന്നെ പ്രോത്സാഹിപ്പിക്കുകയും സഹായസഹകരണങ്ങള്‍ ചെയ്യുകയും ചെയ്ത വീട്ടുകാര്‍, എന്‍റെ സുഹൃത്തുക്കള്‍, എന്‍റെ വിദ്യാര്‍ഥികള്‍ എല്ലാവരോടും എന്‍റെ നന്ദിയും ആദരവും അറിയിക്കുന്നു. സര്‍വ്വോപരി ഈ കവിതാ സമാഹാരം യാഥാര്‍ഥ്യമാക്കിയ കുരുക്ഷേത്രയ്ക്കും ഹൃദയം നിറഞ്ഞ നന്ദി.

അമേരിക്കയിലെ എല്ലാ കലാലയ പണ്ഡിതന്മാരേയും  ചേര്‍ത്തുവച്ചാല്‍ അവരുടെ അറിവിനേയും അതിക്രമിക്കുന്ന  ഒരു യുവഹിന്ദു സന്യാസി- സ്വാമി വിവേകാനന്ദന്‍റെ വാഗ്ധോരണിയില്‍ മുങ്ങിപ്പോയി പാശ്ചാത്യലോകം. ഹിന്ദുത്വത്തിന്‍റെ ഗരിമ വാനോളം ഉയര്‍ത്തിയ സ്വാമി വിവേകാനന്ദന്‍ ചിക്കാഗോ മതമഹാസമ്മേളനത്തില്‍ അവതരിപ്പിച്ച അഞ്ചു പ്രസംഗങ്ങളും ഒരു പ്രബന്ധവുമാണ് ഈ പുസ്തകത്തിലുള്ളത്.

ശ്രീ ഗോസ്വാമി തുളസിദാസനാല്‍ വിരചിതമായ ശ്രീ ഹനുമാന്‍ ചാലീസാ (നാല്പതു ശ്ലോകങ്ങളിലായി ശ്രീഹനുമാന്‍റെ മഹത്വങ്ങള്‍ വര്‍ണിക്കുന്ന കൃതി) യ്ക്ക് അനേകം വ്യാഖ്യാനങ്ങള്‍ ഉണ്ടായിട്ടുണ്ട്.ഇതില്‍ മറ്റു വ്യാഖ്യാനങ്ങളില്‍ നിന്നും വ്യത്യസ്തമായി ശബ്ദാര്‍ഥത്തോടൊപ്പം വാക്യാര്‍ഥവും ഭാവാര്‍ഥവും കൊടുത്തിരിക്കുന്നു. അര്‍ഥം ശരിക്കും മനസ്സിലാക്കി ഗ്രന്ഥം പാരായണം

കേരളീയഭവനങ്ങളില്‍ രാമായണപാരായണം നിത്യാനുഷ്ഠാനങ്ങളില്‍ ഒന്നാണ്. ഒരുകാലത്ത് രാവിലെയോ സന്ധ്യയ്ക്കോ രാമായണം വായിക്കാത്ത കേരളീയഭവനങ്ങളുണ്ടായിരുന്നില്ല.  ചെറിയവരും വലിയവരും എന്ന ഭേദമില്ലാതെ, അക്ഷരശുദ്ധിയോടെ രാമായണം വായിച്ച്, സരസമായും സഭ്യമായും സംസാരിക്കാന്‍ കേരളീയര്‍ പഠിച്ചതും, അക്ഷരശുദ്ധി കൈവരിച്ചതും രാമായണപാരായണംകൊണ്ടാണ്.  മാതൃഭാഷാസംസ്കാരം നഷ്ടപ്പെട്ടുവെന്നു വിലപിക്കുന്ന ഇംഗ്ലീഷ് മാധ്യമക്കാരനായ ആധുനിക മലയാളിക്ക്, രാമായണപാരായണം ഒന്നുകൊണ്ടുമാത്രം മലയാളപാരമ്പര്യം കാത്തു രക്ഷിക്കാന്‍ കഴിയും. അത്രയ്ക്കുണ്ട് രാമായണമാഹാത്മ്യം.

മാനവജീവിതവുമായി ഇഴുകിച്ചേര്‍ന്നിരിക്കുന്ന രാമായണത്തിലെ സ്ത്രീകഥാപാത്രങ്ങള്‍ വളരെ ശക്തമായ സാന്നിധ്യമാണ്. ദശരഥമഹാരാജാവിന്‍റെ ജീവിതം ദുഃഖപര്യവസായിയാക്കാന്‍ കൈകേയിക്കു കഴിഞ്ഞെങ്കില്‍, അമിതാസക്തി പൂണ്ട രാവണനെയും കുലത്തെയും നശിപ്പിക്കാന്‍ ശൂര്‍പ്പണഖയ്ക്ക് സാധിച്ചു; സീതാദേവി ഒരു നിമിത്തവും. രാമായണത്തിലെ പ്രമുഖ സ്ത്രീകഥാപാത്രങ്ങളെ അവതരിപ്പിക്കുന്നത് വിവര്‍ത്തകന്‍, പത്രപ്രവര്‍ത്തകന്‍ എന്നീ നിലകളില്‍ പ്രശസ്തനായ ശ്രീ.പി.കെ. സുകുമാരനാണ്. കൗസല്യ മുതല്‍ സ്വയംപ്രഭ വരെയുള്ള പതിനാല് പ്രമുഖസ്ത്രീകഥാപാത്രങ്ങളുടെ കഥയാണ് ഈ ലഘുഗ്രന്ഥം.

രാമരാവണയുദ്ധമാണു രാമായണത്തിന്‍റെ മുഖ്യപ്രമേയമെന്നു പലരും വിചാരിക്കുന്നു. എന്നാല്‍ യുദ്ധത്തിന്‍റെയല്ല, സമാധാനത്തിന്‍റെയും സത്യധര്‍മാദിസദ്ഗുണങ്ങളുടേയും സന്ദേശങ്ങളാണ് രാമായണത്തില്‍ നിന്നു നമുക്കു ഗ്രഹിക്കാനുള്ളതെന്നു സൂക്ഷ്മാവലോകനത്തില്‍ കാണാന്‍ കഴിയും. രാമായണമാസം ആചരിക്കാന്‍ പൂര്‍വികര്‍ തുടക്കമിട്ടത് മുഖ്യമായും രണ്ടു ലക്ഷ്യങ്ങളോടെയാകണം. ഭക്തിയിലൂടെ ജനങ്ങളെ ആകര്‍ഷിച്ചു ഭാഷാശക്തിയും ഭാവനയും വളര്‍ത്തലാണ് അതിലൊന്ന്. പ്രതിസന്ധികളെ തരണം ചെയ്തു ജീവിക്കാനുള്ള സഹനശക്തിയും ആത്മബോധവും ഉണ്ടാക്കിയെടുക്കലാണ് മറ്റൊന്ന്.

ഭാരത നവോത്ഥാന ചരിത്രത്തില്‍ കര്‍മകുശലതയുടെ ആള്‍രൂപമായി തിളങ്ങിയ ഡോ. ഭീമ റാവു അംബേദ്ക്കറെക്കുറിച്ച് ബി.എം.എസ്. സ്ഥാപകന്‍ ദത്തോപന്ത് ഠേംഗഡി എഴുതിയ ഗ്രന്ഥത്തിന്‍റെ മലയാള പരിഭാഷയാണിത്. ഡോ. അംബേദ്ക്കറുടെ സമൂഹോദ്ധാരണ ജീവിതത്തെ അടുത്തറിഞ്ഞ ഠേംഗഡി രചിച്ച ഒരേയൊരു ജീവചരിത്രവുമിതുതന്നെ.
പന്ത്രണ്ട് അധ്യായങ്ങളിലും പത്തൊന്‍പതു പരിശിഷ്ടങ്ങളിലുമായി ബാബാ സാഹബിന്‍റെ സമരോത്സുക വ്യക്തിത്വത്തെ സ്പഷ്ടമായും വസ്തുനിഷ്ഠമായും വിലയിരുത്തി ചിന്താശാലിയായൊരു സംഘാടകന്‍ എത്തിച്ചേര്‍ന്ന അന്തിമനിഗമനം എന്ന പ്രത്യേകതയും ഈ കൃതിക്കുണ്ട്. മൂലകൃതി അര്‍ഥഭേദം വരാതെ വിവര്‍ത്തനം ചെയ്ത ഡോ. കെ.സി. അജയകുമാറിന് നന്ദി.
ഭാരതാംബയുടെ ഉത്തമപുത്രനുമുമ്പില്‍ മുകളിതഹസ്തരായി കേരളീയ സമൂഹത്തിന് വായനയ്ക്കും സംവാദത്തിനുമായി ഈ സമര്‍ഥവിചിന്തനങ്ങള്‍ സമര്‍പ്പിക്കുന്നു

മഹനീയമായ ആര്‍ഷപൈതൃകത്തിന്‍റെ സാംസ്കാരിക ഔന്നത്യത്തിനുള്ള ഏകകാരണം അനാദിയായി ഈ പുണ്യഭൂമിയിലവതീര്‍ണരാകുന്ന ഗുരുജനങ്ങളാണ്. ജഗദ്ഗുരുവായ അമ്മയിലെത്തി നില്ക്കുകയാണ് ഈ ഗുരുപരമ്പര. നിര്‍ഭാഗ്യമെന്ന് പറയട്ടെ, പുതുതലമുറ ആര്‍ഷസംസ്കാരത്തെയും ഈ സംസ്കാരത്തെ സാക്ഷാത്ക്കരിച്ച ഗുരുപരമ്പരയെയും വിസ്മരിക്കുകയാണ്. ആനുകാലിക സംഭവങ്ങള്‍ പരിശോധിക്കുമ്പോള്‍ ഇത്തരമൊരു മഹത്തായ പാരമ്പര്യത്തിന്‍റെ പിന്‍ഗാമികളാണ് നാം എന്നഭിമാനിക്കുവാന്‍ മാത്രം നമ്മില്‍ എന്തവശേഷേിക്കുന്നു എന്ന് ആത്മപരിശോധന നടത്തേണ്ടതുണ്ട്. പ്രേമമൂര്‍ത്തിയായ അമ്മയുടെ ജീവിതത്തെയും കര്‍മത്തെയും സന്ദേശത്തെയും ഗുരുമഹിമയെയും വിശകലനം ചെയ്യുകയാണ് 'അമൃതം വിളമ്പുന്ന അമ്മ'. അമ്മയിലൂടെ അമൃതത്ത്വത്തിലേക്കുള്ള മാര്‍ഗം കാണിച്ചുതരുന്ന ഈ ഗ്രന്ഥം എല്ലാവര്‍ക്കും നല്ല വായനാനുഭവമായി തീരട്ടെ. ഗ്രന്ഥകാരന് അമ്മയുടെ മഹാനുഗ്രഹമുണ്ടാകട്ടെ എന്ന് പ്രാര്‍ഥിക്കുന്നു

കേരളത്തില്‍ ക്ഷേത്രങ്ങളോട് ബന്ധപ്പെട്ടും അല്ലാതെയും ധാരാളം ആചാരങ്ങളും അനുഷ്ഠാനങ്ങളും നിലവിലുണ്ട്. പലതും മണ്‍മറഞ്ഞുപോയി. ചിലത് അനാചാരങ്ങളുമായിത്തീര്‍ന്നു. എങ്കിലും അവയ്ക്കുള്ള സ്വാധീനം ഇന്നും ജനങ്ങള്‍ക്കിടയില്‍ തള്ളിക്കളയാനാവാത്തവിധം വേരൂന്നിനില്‍ക്കുന്നു. പ്രശ്നോത്തരിക്ക് അവലംബം അത്തരം ആചാരാനുഷ്ഠാനങ്ങളില്‍ നിന്ന് തെരഞ്ഞെടുത്തവയാണ്. ഗഹനമായ വിഷയമാകയാല്‍ ചുരുക്കി പ്രശ്നോത്തരീരൂപത്തില്‍ അവതരിപ്പിച്ചിരിക്കുന്നു. പല വിഷയങ്ങളെക്കുറിച്ചും ഇതിലൂടെ ബോധവല്‍ക്കരിക്കാനുള്ള ശ്രമം നടത്തിയിരിക്കുന്നു. തിരക്കുപിടിച്ച ആധുനിക മനുഷ്യന് മനസ്സില്‍ തങ്ങി നില്‍ക്കുന്ന ചോദ്യങ്ങള്‍ക്കും സംശയങ്ങള്‍ക്കും എളുപ്പത്തില്‍ ഉത്തരം കണ്ടെത്താനും അറിവുപകരാനും പ്രശ്നോത്തരി സഹായകരമാണ്, വിഷയത്തിലേക്ക് ആഴ്ന്നിറങ്ങി പഠിക്കാന്‍ സമയമില്ലാത്തവര്‍ക്ക് ഈ പുസ്തകം അല്‍പമെങ്കിലും ഉപകരിക്കുമെന്ന് വിശ്വസിക്കട്ടെ!