ഈയിടെ ഗുരുവായൂര്‍ ക്ഷേത്രത്തില്‍ കൃഷ്ണനാട്ടം കാണാന്‍ ഇടവന്നു.  കൂടെ പേരക്കുട്ടികളും ഉണ്ടായിരുന്നു.
നൃത്തവും വേഷവും കണ്ടു രസിക്കാന്‍ കുട്ടികള്‍ക്ക് കഴിഞ്ഞെങ്കിലും മറ്റൊന്നും മനസ്സിലാക്കാന്‍ അവര്‍ക്കു കഴിഞ്ഞില്ല.  അതാണ് ഈ ബാലസാഹിത്യകൃതി പിറക്കാനുണ്ടായ പശ്ചാത്തലം.
ഗുരുവായൂരില്‍ മാത്രം അരങ്ങേറിവന്നിരുന്ന കൃഷ്ണനാട്ടം കളി ഇന്ന് മറ്റു സ്ഥലങ്ങളിലും അവതരിപ്പിച്ചുതുടങ്ങിയത് സ്വാഗതാര്‍ഹമാണ്.  അതുകൊണ്ട് കൃഷ്ണനാട്ടത്തിന്‍റെ പ്രസിദ്ധി സര്‍വത്ര പരന്നു.

വേദാന്തസാരമാണ് ഭഗവദ്ഗീത. ഓരോ വായനയിലും അര്‍ഥാന്തരങ്ങളുടെ അലമാലകള്‍ തുടിച്ചുയരുന്ന അപൂര്‍വമായ കാഴ്ചയാണ് ഗീതാപാരായണം സമ്മാനിക്കുന്നത്. ഗീതയ്ക്ക് നിരവധി വ്യാഖ്യാനങ്ങള്‍ മലയാളത്തിലും ഇംഗ്ലീഷിലുമായിട്ടുണ്ട്. ഓരോ വ്യാഖ്യാനവും അപഗ്രഥിച്ച് ഭഗവദ്ഗീതയ്ക്കൊരു പ്രശ്നോത്തരി നിര്‍മിക്കുക സാധ്യമല്ല. അത്രയേറെ വിപുലമാര്‍ന്ന ആശയവൈരുദ്ധ്യങ്ങള്‍ ചില വ്യാഖ്യാനങ്ങള്‍ തമ്മിലുണ്ട്. ഗീതാവ്യാഖ്യാനം പോലെ ഒരിക്കലും പൂര്‍ണമാകാത്ത ഒരു സമസ്യയാണ് ഗീതാ പ്രശ്നോത്തരിയും. രണ്ട് പാദങ്ങളുള്ള ഗീതയിലെ  ഒരു ശ്ലോകത്തില്‍ നിന്നു തന്നെ പത്ത് ചോദ്യങ്ങള്‍ ഉണ്ടാക്കാം. അത്രയും അതിഗഹനമാണ് ഓരോ ശ്ലോകവും. അങ്ങനെയുള്ള 700 ശ്ലോകങ്ങളില്‍ നിന്ന് ഏകദേശം 7000 ചോദ്യങ്ങള്‍ ഉണ്ടാക്കാന്‍ കഴിയും. അതൊരു ബ്രഹദ് ഗ്രന്ഥരചനയ്ക്കുള്ള മുതല്‍ക്കൂട്ടാണ്. എന്നാല്‍ അത്തരമൊരു സമീപനമല്ല ഇവിടെ സ്വീകരിച്ചിട്ടുള്ളത്. സാധാരണ വായനക്കാര്‍ക്ക് മനസ്സിലാക്കാന്‍ ബുദ്ധിമുട്ടുള്ള സാങ്കേതിക പദങ്ങളുടെയും നിര്‍വചിക്കാന്‍ ബുദ്ധിമുട്ടായ ചില വാക്കുകളുടെയും പ്രശ്നപരിസരങ്ങളെ ചോദ്യരൂപത്തില്‍ തയ്യാറാക്കി അവയ്ക്ക് വളരെ ലളിതമായി ഉത്തരം പറയുക എന്ന രീതിയാണ് ഈ പുസ്തകത്തില്‍ അവലംബിച്ചിട്ടുള്ളത്.

കാര്യം പറയാനായി കഥ പറയുക എന്നത് തികച്ചും ഭാരതീയമായ കഥാഖ്യാന ശൈലിയാണ്. വാല്മീകിവ്യാസന്മാർ  തന്നെയാണ് ഇതില്‍ ആചാര്യന്മാർ . മഹാഭാരതത്തിലെ ഉപാഖ്യാനങ്ങള്‍ എല്ലാം തന്നെ ഏതെങ്കിലും ഒരു തത്വം വിശദീകരിക്കുന്നതിന് വേണ്ടിയാണ് ഉപകരണമാക്കിയിരിക്കുന്നത്. കഥാപാത്രങ്ങളുടെ ചിത്ത വ്യാപാരത്തേയും അനുഭവ ഭൂമികയേയും അനാവരണം ചെയ്തുകൊണ്ട് ഒരു തത്വം വിശദീകരിക്കുന്ന ഈ ശീലം കഥക്ക് ഓജസ്സും കരുത്തും നല്‍കുമെന്നതും സുവിദിതമാണ്.
   കാര്യം പറയാനല്ലാതെ കഥ പറഞ്ഞുപോകുന്നവര്‍ കഥയില്ലാത്തവരാണ്. ധര്‍മാചാരണത്തിലൂടെ മോക്ഷപ്രാപ്തിക്ക് ശ്രമിക്കുന്ന ഒരുവന്‍റെ ജീവിത സമഗ്രതയെയാണ് മര്യാദാപുരുഷോത്തമനായ ഒരു രാമന്‍റെ കഥയിലൂടെ വാല്മീകി നിര്‍വഹിച്ചത്. പഞ്ചതന്ത്രകഥകള്‍ മുതല്‍ ഐതിഹ്യങ്ങള്‍ വരെ എല്ലാത്തിലും കഥപറച്ചിലിലൂടെയുള്ള തത്വനിര്‍ധാരണം നമുക്ക് കാണാന്‍ കഴിയും.

മാനവജീവിതവുമായി ഇഴുകിച്ചേര്‍ന്നിരിക്കുന്ന രാമായണത്തിലെ സ്ത്രീകഥാപാത്രങ്ങള്‍ വളരെ ശക്തമായ സാന്നിധ്യമാണ്. ദശരഥമഹാരാജാവിന്‍റെ ജീവിതം ദുഃഖപര്യവസായിയാക്കാന്‍ കൈകേയിക്കു കഴിഞ്ഞെങ്കില്‍, അമിതാസക്തി പൂണ്ട രാവണനെയും കുലത്തെയും നശിപ്പിക്കാന്‍ ശൂര്‍പ്പണഖയ്ക്ക് സാധിച്ചു; സീതാദേവി ഒരു നിമിത്തവും. രാമായണത്തിലെ പ്രമുഖ സ്ത്രീകഥാപാത്രങ്ങളെ അവതരിപ്പിക്കുന്നത് വിവര്‍ത്തകന്‍, പത്രപ്രവര്‍ത്തകന്‍ എന്നീ നിലകളില്‍ പ്രശസ്തനായ ശ്രീ.പി.കെ. സുകുമാരനാണ്. കൗസല്യ മുതല്‍ സ്വയംപ്രഭ വരെയുള്ള പതിനാല് പ്രമുഖസ്ത്രീകഥാപാത്രങ്ങളുടെ കഥയാണ് ഈ ലഘുഗ്രന്ഥം.

രാമരാവണയുദ്ധമാണു രാമായണത്തിന്‍റെ മുഖ്യപ്രമേയമെന്നു പലരും വിചാരിക്കുന്നു. എന്നാല്‍ യുദ്ധത്തിന്‍റെയല്ല, സമാധാനത്തിന്‍റെയും സത്യധര്‍മാദിസദ്ഗുണങ്ങളുടേയും സന്ദേശങ്ങളാണ് രാമായണത്തില്‍ നിന്നു നമുക്കു ഗ്രഹിക്കാനുള്ളതെന്നു സൂക്ഷ്മാവലോകനത്തില്‍ കാണാന്‍ കഴിയും. രാമായണമാസം ആചരിക്കാന്‍ പൂര്‍വികര്‍ തുടക്കമിട്ടത് മുഖ്യമായും രണ്ടു ലക്ഷ്യങ്ങളോടെയാകണം. ഭക്തിയിലൂടെ ജനങ്ങളെ ആകര്‍ഷിച്ചു ഭാഷാശക്തിയും ഭാവനയും വളര്‍ത്തലാണ് അതിലൊന്ന്. പ്രതിസന്ധികളെ തരണം ചെയ്തു ജീവിക്കാനുള്ള സഹനശക്തിയും ആത്മബോധവും ഉണ്ടാക്കിയെടുക്കലാണ് മറ്റൊന്ന്.